Bewerbung
Guude ,
Habt er net en Schobb fer misch ?

Isch hab Ihnne Ihr Adress vonerem Kumpel gekrischt
un vielleischt habbe se ja ebbes für misch, z.B. als
Hausmaista.

Isch heiß Karl-Heinz Gebbard, die Kumples nenne mich allerdings " Schobbe".
Geborn bin isch am 25.10.55 in Hanau. Isch seh zwar älter aus , aber isch war
auch lang krank. Mei Schulausbildung is 12 Jahr Grundschul Groß-Krotzebosch
mit anschließender Lehre als Feinmeschaniker , Einzelhandelskaufmann un dann
Gas-Wasser Installateur. Die erste zwei warn nix, die Dritt hab ich dann 1989
abgeschlosse. Dadedach war isch korz für 5 Jahr net verfügbar ( isch will net
drübber redde, dumm Sach - vergesse beim Aldi zu bezahle... )

Isch bin handwecklisch äußest geschickt un deschnisch wersiehrt und hätt auch
grad Zeit , da mein letzter Chef net mit mir zurechtgekomme is.

Dazu muß isch sagge, daß isch hin und widder gerne mal ein zwitscher, aber net
uff de Abbeit, höschsten in de Frühstückspaus und Mittagspaus, unn aach e klaa
Kaffepaus werd ja wohl drin sein . Mehr werd ja aach viel ruhischer nach so em
klaane Hütsche , Sie wisse schon gell.

Aber zurück zu dämm Grund von mein Schreibe. Isch such Abbeit. Jetzt aach net
grad so rischtich was Schweres ( mer werd ja net jinger, gell), aber so was mit
beuffsischtische von Wohnunge unn Schigganiern von Leut, die wo da drin
wohne - des kann isch.

Das letzte mal war isch aach Hausmeister innerem Hochhaus, unn glaab isch
hab mer da so e paar Fertischkeide angeeischnet, die wo mir bei Ihne helfe könnt.

Isch kann sehr gut :

* Über de Hof brülle
* ´Kinner vom Rase verscheusche
* Autos uffschreibe die am falsche Packplatz stehe
* Fußbäll platt schtesche
* Türn uffschtemme odda eitrede
* Im Keller rummgeistern
* Putzplän kontrolliern
* Schmierfinke bei de Polizei abliffern
* Offenbächer kloppe

Außerdem hab isch aach wie gesacht Heizungsbauer gelernt. Bei de GWS.
Leider sinn die Zeuschnisse irschenwie verschlampt worn, net von mir, da bin
isch sher gewissenhaft, des muß en annern gewese sein. Aber Hand uffs Herz
nur Aanser. Isch dät misch freue, wenn Sie mir Geleschenheid gäbe däte misch
emal persehnlisch vorzustelle, ( isch dät auch e klaa Likörsche mitbringe - da babbelt
sisch leichter, gell. )

Ansonsten verbleich isch
Ihnne Ihm Karl-Heinz Gebbard

PS. Vor 11:00 gehts net, da hab isch Frühschobbe